Heb 3 | NSN | STEP | Temaeit ro bung uanotoug gesir dedeil, inggoumeit ke kila ponois God i Heuen, mu uamoko tun teremi ninamana tang Iesu geke heirihain God a tamatang keip uelhire tagigeig, doha Patere Uleik geri hire taueteieig teregi nitagorong man.

a 3.1-2Aha 12.7; Hib 4.14; 7.26

b 3.5Aha 12.7; Ual 18.15-19

c 3.7-11Ker 95.7-11

d 3.8KT 17.7; Aha 20.2-5

e 3.11Aha 14.21-23

g 3.15Hib 3.7-8

hKer 95.7

i 3.16Aha 14.1-35

j 3.171Ko 10.10

Hebrews 3

O Mahar 3

Iesu a i rana uain tang Moses

1 ^aTemaeit ro bung uanotoug gesir dedeil, inggoumeit ke kila ponois God i Heuen, mu uamoko tun teremi ninamana tang Iesu geke heirihain God a tamatang keip uelhire tagigeig, doha Patere Uleik geri hire taueteieig teregi nitagorong man. 2 God ke uamatoto tatanon, doh inggono ke kalekinale uaia tun tang God, te misiana kompe tang Moses ke kalekinale uaia keip tun pe tar mamang inetelik tena uma God tosno tamata Godosin. 3 Iesu ra ueltadantiehe uainin tang Moses, te misiana kompe tar tamatang tuha tar um ra ueltadantiehe uainin tar uma katong. 4 Ge o uma uakapa pe, o nituhang tamat. Bo God puk teke tuhampe tar mamang inetelik.

5 ^bMoses ke kalekinale uaia sir tun nomanampe a tamatang kalekinale tosno tamata God, doh na kalekinaleon ke ualasira uakalahara tun tar ineter man gere turung uakalaharaig God gitila i uoum. 6 Bo gitie pukur tuna God pe Kristo, inggono teke i rana uainingua tosno tamata God. Doh inggeigener tamatang tagorong man, inggeig tena umon geti uaongolompelasieig, kari uoho uanono tar inete ri tagorong mana teilin tang Kristo. 7 ^cTemaeit mu namana dedeoum ke kula per Iabena Dedeil pare,

“Daana getung longoroum tar uauouguo,
8 ^dahik pah mu mahang longor
misiana ka guata uoumper Israel
tar binaka ka uanimaliana,
kara uedanga to totoguo tar butur paden.
9 Ter buturuono ka uedangantiehe to tun ro bungumiuoum totoguo,
kara uedanga tereguor hamhamas,
gitiempe ka banga pesina tenag nitouo toro toueitir hangaul ro krismas.
10 Temaeit inggo ku nimalianantiehe tun tasir Israelesinasit
ka uangoulume tar binakon, karu kulo pare,
‘Gisin ra uoto pe puk ra la teil tereisir nimalar,
kara hik pah ka naman manate ter noguor hagar.’
11 ^eTemaeit ku nimaliana inggo, karu uaman i rana pare,
‘Ahik tunusin pah ra turung lekala tenag buturung pepe uaho.’” ^{▼▼3.11Bolobolong Ker 95.7}

12 Ro bung uanotoug, mu tagin, karung kaueke uanono tar koloumiu tar niguata uasa, doh tar tagorong boh gere reih liu penin tamiuoum tang God ger tua. 13 Bo mu uelmene uatampopokoho dedempesioum tar mamang mareinilik, sikina re moko haraha per binak mara hik me kalamiuoum re uelourinir niguata uasa, kare la mahang longor. 14 Ge gitie pe geti uoho uanoneig tar nitagorong man e tuka tar uadouhinar binak, kari tagorong mana uapopokoho tun tang God misiana ki uakekene pe, inggeig i turung uelpakah tagungua tar hauar nang Kristo. 15 ^gGine te hape ko kula pe no uelhire God,

“Daana getung longoroum tar uauouguo,
ahik pah mu mahang longor,
misiana ka guata uoumper Israel tar binaka ka uanimaliana
kara uedanga to totoguo tar butur paden.” ^h

16 ⁱBo mais ka longoro tar uauana God, kara uanimaliana tatanon? Tesir tamata dehesin geke uoum tauete keip turis Moses i Isip. 17 ^jDoh mais ke nimalianais God toro toueit ro hangaul ro krismas? Ahikiono pah teisis geka guata tar niguata uasa geke mata rikin tor tukunus tar butur paden? 18 Ge mais pesina ke ualapagahais God pare, ahik tun pah ra turung lekala tenag buturung pepe uaho? Gisina teesis ka tagorong boho tatanon. 19 Temaeit inggeig i naman manate uaia tunungua tasisin ahik pe pah ka banotong la uangoul toro mahar koto roon, teeitimpe ka tagorong boho pesin.